Основната цел на Македонскиот славистички комитет е да соработува со Меѓународниот славистички комитет во организирањето на меѓународни конгреси и научни состаноци. Здружението врши избор на македонските претставници на меѓународните славистички конгреси што се одрѓуваат секои пет години и избор на македонски претставници во Меѓународниот комитет на славистите.
По Првата светска војна доаѓа до засилен развиток на славистиката низ Европа, а особено во новосоздадените словенски држави. Заедно со тоа расте и потребата за потесно меѓународно поврзување на славистите. Како повод за обединување е земена стогодишнината од смртта на родоначалникот на славистичката наука Јозеф Добровски (1753-1829), па во негова чест во Прага во октомври 1929 е одржан Првиот меѓународен конгрес на славистите. Во организацијата на конгресите учествува МСК (Меѓународниот славистички комитет) оформен нешто подоцна.
Првите три конгреси се одржани пред основањето на Меѓународниот славистички комитет: првиот во 1929 год. во Прага; вториот во1934 год. во Варшава и во Краков; третиот, Белградски конгрес, е откажан во предвечерјето на Втората светска војна во 1939 год.
Соработката на славистите од целиот свет е обновена на Меѓународниот славистички состанок одржан во Белград 1955 год. Тогаш е оформен Меѓународен комитет на слависти (МКС) со што дефинитивно е конституирана меѓународна организација со цел да се возобноват и да се продолжат меѓународните врски во областа на славистиката.
Славистиката е наука со комплексен карактер која проучува различни области, почнувајќи од етногенезата на Словените, словенската писменост и култура, народната култура и сл. Запознавање на односите меѓу словенските јазици и култури, словенско-несловенските врски во значителна мерка придонесуваат во запознавањето на европската култура.
